1. Cóica rand rogab in ben a tírib ingnath for láur in tige do Bran mac Febail,
 arrobói a rígthech lán de rígaib, annadfetatar can dolluid in ben, órobatar ind
 liss dúntai.

2.  Is ed tossach in sceóil.  Imluid Bran laa n-and a óinur i comocus dia dún,
 cocúala a ceól íarna chúl.  A n-donécad tar a éissi, ba íarna chúl beus nobíth a
 ceól.  Contuil asendath frissa ceól ar a bindi.  A n-dofúsig asa chotlud, conacca
 in cróib n-arggait fua bláth ind ina arruth, na bu hasse etarscarath a
 bláthe frissin cróib ísin.  Dobert íarum Bran in cróib ina láim dia rigthig.
 Órobatar inna sochuidi isind rígthig conaccatar in mnái i n-étuch ingnuth for láur
 in tige.  Is and cachain in cóicait rand so do Braun arranchúale in slog, ocus
 adchondarcatar uili in mnái.

Ocus asbert:

                3. 'Cróib dind abaill a hEmain

                  dofed samail do gnáthaib

                  gésci findarggait fora,

                  abrait glano co m-bláthaib.


                4. 'Fil inis i n-eterchéin

                   immataitnet gabra réin,

                   rith find fris' tóibgel tondat,

                   cetheóir cossa foslongat.


                5. 'Is lí súla, sreth íar m-búaid,

                  am-mag forclechtat int Aelúaig:           

                  consna curach fri carpat

                  isin maig tess Findarggat.


                6. 'Cossa findrune fóe,

                   taitni tré bithu gnóe:

                   cáin tír tría bithu bátha,

                   forsnig inna hilblátha.


                7. 'Fil and bile co m-bláthaib

                   forsñgairet eóin do thráthaib:

                   is tré cocetul is gnáth

                   congairet uili cech tráth.


                8. 'Taitnet líga cech datho

                   trésna maige móithgretho,

                   is gnáth sube, sreth imm chéul,

                   isin maig tess Arggatnéul.


                9. 'Ní gnáth écóiniud na mrath

                   hi mruig dénta etargnath,

                   ní bíi nach gargg fri crúais,

                   acht mad céul m-bind frismben clúais.


                10. 'Cen brón, cen duba, cen bás,

                   cen nach n-galar cen indgás,

                   is ed etargne n-Emne,

                   ní comtig a comamre.


                11. 'Cáine tíre adamri,

                   ata comgnúsi cadli,

                   asa rodarc find fia,

                   ní fríthid bíd a cia.


                12. 'Má adcetha Airchthech íar tain

                   forsnig dracoin ocus glain

                   dosnig am-muir fri tír toind,

                   trilsi glano asa moing.


                13. 'Móini, dússi cach datho

                   hi Ciúin, cáine étatho,

                   étsecht fri céul co m-bindi,

                   óol fíno óingrindi.


                14. 'Carpait órdi hi Maig Réin,

                   taircet la tule don gréin,

                   carpait arggait i Maig Mon

                   ocus crédumi cen on.


                15. 'Graig óir budi and fri srath

                   graig aile co corcardath,

                   graig aile ualann tar ais

                   co n-dath nime hulegais.


                16. 'Dofeith la turchbáil n-gréne

                   fer find forosna réde,

                   rédid mag find frismbein muir,

                   mescid fairggi co m-bí fuil.


                17. 'Dofeith in slúag tar muir glan,

                   don tír donaidbri imram,

                   imráid íarum dond licc léur

                   asa comérig cét céul.


                18. 'Canid airbitiud dont Aelóg

                   tré bithu sír, nat bí tróg,

                   tormaig céul co córib cét,

                   ní frescet aithbe ná éc.


                19. 'Emne ildebach fri rían,

                   bésu ocus, bésu chían,

                   i fil ilmíli m-brec m-ban,

                   immustimerchel muir glan.


                20. 'Má ruchúala lúad in chiúil,

                   esnach énán a hImchiúin,

                   dofeith banchorén di haa

                   cusa cluchemag itaa.


                21. 'Dofeith sóire la sláini

                   don tír frisferat gáiri,

                   is i n-Imchiúin cach ági

                   dofeith búaine la háni.


                22. 'Is lá suthaine síne

                   dosnig arggat i tíre,

                   aill erfind for idna réin

                   foafeid a gríss a gréin.


                23. 'Graibnid in slóg íar Maig zmon,

                   cluche n-álaind, nad indron,

                   i mruig mrecht úas maisse mét,

                   ní frescat aithbe ná éc.


                24. 'Étsecht fri céul i n-adig,

                   ocus techt i n-Ildathig,

                   mruig mrecht, líg úas maisse mind,

                   asa taitni in nél find.


                25. 'Fil trí cóictea inse cían

                   isind oceon frinn aníar;

                   is mó Érinn co fa dí

                   cach ái díib nó fa thrí.


                26. 'Ticfa már-gein íar m-bethaib

                   nad bía for a forclethaib,

                   mac mná nad festar céle,

                   gébid flaith na n-ilmíle.


                27. 'Flaith cen tossach cen forcenn,

                   dorúasat bith co forban,

                   isai talam ocus muir,

                   is mairgg bías fua étuil.


                28. 'Is hé dorigni nime,

                   céinmair dia m-ba findchride,

                   glanfid slúagu fua linn glan,

                   is hé ícfes for tedman.


                29. 'Ní dúib uili mo labre,

                   cia atfess a móramre;

                   étsed Bran de betho bróu

                   a n-di ecnæ adfét dóu.


                30. 'Ná tuit fri lige lesce,

                   nachit-tróithad do mesce,

                   tinscan imram tar muir glan,

                   dús in rista tír na m-ban.'


31. Luid in ben úadib íarom annadfetatar cia luid, ocus birt a cróib lee.  Leblaing 

in chróib di láim Brain co m-bói for láim inna mná, ocus ní bói nert i láim Brain 

do gabáil inna cróibe.


32. Luid Bran íarom arabárach for muir.  Trí nonbuir a lín.  Óin∫er forsnaib 

tríb nonburaib dia chomaltaib ocus comáisib.  Ó robói dá lá ocus dí aidchi forsin 

muir, conacci a dochum in fer isin charput íarsin muir.  Canaid in fer hísin dano 

trichait rand n-aile dóu, ocus sloindsi dóu ocus asbert ba hé anannán mac Lir, ocus 

asbert bói aire tuidecht i n-êrinn íar n-aim-seraib cíanaib, ocus nogigned mac úad 

.i. Mongán mac Fíachnai, ised foridmbíad.  Cachain íarom in trichait rand sa dóu:--


                33. 'Cáine amre lasin m-Bran

                   ina churchán tar muir glan;

                   os mé im' charput di chéin,

                   is mag scothach immaréid.


                34. 'A n-as muir glan

                   don nói broinig itá Bran,

                   is mag meld co n-immut scoth

                   dam-sa a carput dá roth.


                35. 'Atchí Bran

                   lín tond tibri tar muir glan:

                   atchíu cadéin i Maig Mon

                   scotha cennderga cen on.


                36. 'Taitnet gabra lir i sam

                   sella roisc ro aíri Bran,

                   bruindit srotha srúaim de mil,

                   i crích Manannáin maic Lir.


                37. 'Lí na fairgge foratái,

                   geldod mora immerái,

                   rasert bude ocus glass,

                   is talam, nad écomrass.


                38. 'Lingit ich bricc ass de brú

                   a muir find forsnaicci-siu,

                   it lóig, it úain co n-dath,

                   co cairddi, cen immarbad.


                39. 'Cé atchetha óinchairptech

                   i Maig Meld co n-immut scoth,

                   fil mór d'echaib for a brú,

                   cen suidi nad aicci-siu.


                40. 'Mét in maige, lín int Aelúaig,

                   taitnet líga co n-glanbúaid,

                   findaeruth arggait, drepa óir,

                   taircet fáilti cech imróill.


                41. 'Cluche n-óimin n-inmeldag

                   aigdit fri nín n-imborbag

                   fir is mná míne fo doss,

                   cen peccad, cen immorboss.


                42. 'Is íar m-barr edo rosná

                   do churchán tar indrada,

                   fil fid fo mess i m-bí gnóe

                   foa braini do beccnóe.


                43. 'Fid co m-bláth ocus torud

                   forsmbí fíne fírbolud,

                   fid cen erchre, cen esbad,

                   forsfil duilli co n-órdath.


                44. 'Fil dún ó thossuch dúle

                   cen áiss, cen foirbthe n-úre,

                   ní frescam de mbeth anguss,

                   níntaraill int immorbus.


                45. 'Olc líth dolluid ind nathir

                   cosin n-athir dia chathir,

                   sáib sí céni i m-bith ché

                   co m-bu haithbe nad búe.


                46. 'Ronort a cróis ocus saint,

                   trésa n-derbaid a óirchlaind,

                   ethais corp crín cró péne

                   ocus bithaittreb rége.


                47. 'Is recht úabuir i m-bith ché

                   cretem dúle, dermat n-Dé,

                   tróithad n-galar, ocus áiss,

                   apthu anma tría togáis.


                48. 'Ticfa tessarcon úasal

                   ónd ríg dorearúasat,

                   recht find fuglóisfe muire,

                   sech bíd Día, bíd duine.


                49. 'In delb hé nofethi-su

                   rothicfa it' lethe-su

                   arumthá echtre dia tig

                   cosin mnái i Linemaig.


                50. 'Sech is Moninnán mac Lir

                   asin charput cruth ind fir,

                   blíaid dia chlaind densa angair

                   fer cáin i curp críad gil.


                51. 'Conlee Monann maccu Lirn

                   lúthlige la Cáintigirn,

                   gérthair dia mac i m-bith gnóu,

                   adndidma Fíachna mac n-dóu.


                52. 'Móithfe sognáiss cach síde,

                   bíd tretel cach dagthíre,

                   adfii rúna, rith ecni,

                   isin bith cen a ecli.


                53. 'Biaid i fethol cech míl

                   itir glasmuir ocus tír,

                   bíd drauc ré m-buidnib i froiss,

                   bíd cú allaid cech indroiss.


                54. 'Bíd dam co m-bendaib arggait

                   i mruig i n-agtar carpait,

                   bíd écne brecc il-lind lán,

                   bíd rón, bíd ela findbán.


                55. 'Bíaid tré bithu síri

                   cét m-blédne hi findrígi,

                   silis lergga, lecht imchían,

                   dercfid rói roth imm rían.

                56. 'Bíd imm rígu la fénnid

                   bíd láth gaile fri aicni,

                   i n-dindach mroga for aa

                   fochicher airchend a Íli.


                57. 'Art arungén la flaithi,

                   gébthir fo mac n-imraichni,

                   sech bíd Moninnán mac Lir

                   a athir, a fithithir.


                58. 'Bíed, bes n-gairit a ree,

                   cóicait m-blédne i m-bith chee,

                   oircthi ail dracoin din muir

                   isind níth i Senlabuir.


                59. 'Timgéra dig al-Loch Láu

                   intan frisseill sidan cráu,

                   gébtha in drong find fu roth nél

                   dund nassad, nad etarlén.


                60. 'Fossad airsin imraad Bran,

                   ní chían co tír inna m-ban,

                   Emne co n-ildath féle

                   ricfe ré fuiniud gréne.


61. Luidi Bran úd íarum co n-acci in n-insi.  Immeraad immecúairt, ocus slóg már

oc ginig ocus gáirechtaig.  Doecitís uili Bran ocus a muintir, ocus ní antís fria 

n-accaldaim.  Adaigtís treftecha gáire impu.  Fóidis Bran fer dia muintir isin 

n-insi.  Reris lia céliu ocus adaiged ginig fóu amal dóini inna hinse olchene.  

Immeraad in n-inis immecúairt.  Intan dothéged a fer muintire sech Bran, adglaitís 

a chocéli.  Nísnaiccilled san immorru, acht dusnéced nammá ocus adaiged ginig fóu.  

Is ed ainm inna hinse so Inis Subai.  Funacabsat and íarum.


62. Ní bu chían íarsin coráncatar tír inna m-ban, co n-accatar braine inna m-ban 

isin phurt.  Asbert tóisech inna m-ban: 'Tair ille isa tír, a Brain maic Febail!  

Is fochen do thichtu.'  Ní lamir Bran techt isa tir.  Dochuirethar in ben certli 

do Braun tar a gnúis cach n-dírech.  Focheird Bran a láim for in certli.  Lil in 

chertle dia dernainn.  Bói snáthe inna certle hil-láim inna mná, consreng in curach 

dochum puirt.  Lotir íarum hi tegdais máir.  Arránic imde ceche lánamne and .i. trí 

nói n-imd*ae*.  In praind dobreth for cech míis nír'irchran dóib.  Ba blédin 

donarfás dóib buith and.  Ecmaing bátir ilblédni.  Nístesbi nach mlass.


63. Gabais éulchaire fer n-díib .i. Nechtán mac Collbrain.  Aitched a chenél fri 

Bran aratíasad leis dochom n-Érenn.  Asbert in ben robad aithrech ind fáboll.  

Dolotar camm*ae*, ocus asbert in ben arnátuinsed nech díib a tír ocus arataidlitís 

leú in fer fodnácaibset i n-Inis Subai tar éssi a chéli.


64. Dollotar íarum condatornachtatar in dáil i Sruib Brain.  Iarmifóchtatar side 

dóib cía dolluide a muir.  Asbert in fer:  'Messe,' ar sé, 'Bran mac Febail.'  'Ní 

beram aichni inní sin,' ol a chéle didiu.  'Atá hi senchasaib linni chene Imram 

Brain.'


65. Dochurethar úadib in fer assin churuch.  Amal conránic side fri talmain inna 

Hérenn, bá lúaithred fochétóir amal bíd i talmain nobeth tríasna hilchéta blíedne.  

Is and cachain Bran in rand so:


                   'Do macc Chollbrain ba mór báiss

                   turcbáil a láme fri áiss,

                   cen nech dobir toind usci glain

                   for Nechtán for mac Collbrain.'


66. Adfét íarsin Bran a imthechta uli ó thossuch cotici sin do lucht ind airechtais, 

ocus scríbais inna rundu so tré ogum.  Ocus celebrais d'oacuteb íarsin, ocus ní fessa a 

imthechta ónd úair sin.

source: Kuno Meyer, translation The Voyage of Bran, pub. David Nutt, London 1895.

top

© Shee-Eire: